Testo: (Giulietta) Dotto' vuie site miereco
m'avite a me da dicere
che vole a mè sta smania
ca nun me fa dormì

E 'a notte si sapissevo
nun pozzo arriposà
e 'o juorno tengo 'a smania 
ca vaco a ccà e a llà

(Dottore) Sta smania ca t’hê miso
Ie già l'aggie capita 
ce vole lu marito
che accussì non puoi stà

Tu sempe a mme me chiamme
ma che ti posso fare
dimme che cosa hai 
ca te pozzo accomodà 

(Giulietta) Quanno m'assetto a tavula
nun saccio si song’ io
pe nu pruvà 'nu 'nticchio
ne tengo 'nu vulìo

E mpietto me sente 'e pognere
e 'o core fa tittà
spesso me vene 'a chiagnere 
aggiatene pietà

(Don Annibale?) Tutto sarà la causa
che non me fa dormire
il cuore così palpita
dal petto vuole uscire

Chi la conosce 'a smania
e tozzola accussì
e chi l'addà conoscere 
sta malatia mò

(Giulietta) Dottò mpersì sì mio padre
tutti me l'anno detto
il male che conosco
voi già l'avete scritto

Dottò dottò diciteci
chello c'avimma fà
e chiaro vuie parlatece 
aggiatene pietà

(Dottore) Povera Giulietta
il cuore si risveglia
ma se l'avrete in moglie 
felice io sarò

Ma se il dottor sapesse
quale sia il senso mio
sicuro io sarrio
di farvela sposà

(Dottore) Mia cara figlia mia
io che ti posso fare
tu mi mandi a impazzire
nun aggio che te fà

Ma chiama il tuo patre
fallo venire qua
vedimmo come meglio 
se pote accomodà 

(Giulietta) Papà io so sanata
Papà io so guarito
E’ stato lu duttore
M’ha sanata la ferita

Dottò dottò diciteci 
chello c'avimma fa’
Il cielo ve lo rende
A me sta carità

(Zì Aniello) Dottò io so’ venuto
dottò io so’ presente
cunsolame ‘sta figlia
ca stai tutta dulente

Dottò facite priesto
chello c'avite fà
‘A chesta malatia
L’avita fa’ sana’

(Dottore) Zì Aniè io mo te servo
a questa ce penzo io
pecchè io so’ 'nu miereco
'e tutte 'e malatie (purcarie)

Ma chesta è cosa 'e niente
se pote accomodà
chiamammo a Don Annibale
e facimmelo spusà ('nguaià)

(Zì Aniello) Tutto mi sento pazzo
non tengo cchiù fermezza
pure ‘o dottore attizza 
pe’ farla ammarità

Mo vene Don Annibale
mia figlia la vì ccà
e dateve la mano
ca puzziete spandeca’

(Don Annibale) Dottò io vi ringrazio 
che siete un buon dottore
qualcosa di danaro
m'avite fa dunà

A tutte 'e feste 'e ballo 
vulimmo accumparì
cu Giulietta mia
assieme cu papà

(Pulcinella) Dottò io v’aggia dicere
‘na cosa…
‘na brutta malatia
ve voglio raccuntà

Carulina, ‘a serva vostra
Io songo ‘o nnammurato
Facimmo ‘sta frittata
E nun ce penzammo cchiù   

(Dottore) Aspettame ‘nu poco
ca mo te dico ‘o tutto
‘o vì quanto sì brutto
m’a vuo’ arruvinà

Figliò tu vienetenne
che cosa ne vuoi fare
chillo è ‘nu ‘ncappamosche

[...]

(Carolina) Dottò vi cerco scusa
Io so ‘na poverella 
Io voglio ‘a Pulecenella
che accussì nun pozze sta’

E quando vene ‘a sera
Io sola m’appaura
assieme ‘a Pulecenella (assieme a ‘stu ciacione) 
io stongo cchiù sicura

(Dottore) Marite tutte e dduie
Facite ‘na cosa ‘e priesto
si no pa ghionta ‘e riesto
V’avessa bastunà

E dateve la mano
Fuite mo da ccà
Si no ‘na brutta cosa
Vuie me facite fa

(Tutti)Signori che state attuorno
E senza cerimonie
A chisti matrimonie
Avite ‘ntervenì

E vuie sunature
Mettiteve a sunà
E nuie tutte quante
Mettimmece a ballà.

Prova generale del Don Annibale eseguita dal gruppo della sezione del PCI di Eboli. Diverse sono le interruzioni dovute o ad errori oppure a dimenticanze del testo da cantare relativo alla parte da ciascuno interpretata (particolari difficoltà durante la prova si hanno con l'interprete del personaggio di Zì Aniello).